“Ötən il Azərbaycanda 102 kişi məişət zorakılığına məruz qalıb”. Bunu “Report”a açıqlamasında Ailə, Qadın və Uşaq Problemləri üzrə Dövlət Komitəsinin hüquqi təminat şöbəsinin müdiri Taliyə İbrahimova deyib.

O bildirib ki, 2016-cı ildə məişət zorakılığı ilə bağlı 897 cinayət hadisəsi qeydə alınıb: “Bunun nəticəsində 791 qadın, yetkinlik yaşına çatmayan 4 şəxs zərər çəkib, 29 qadın isə öldürülüb”.

Komitə rəsmisinin sözlərinə görə, 2016-cı ildə ölkədə 4114 münaqişəli ailə qeydiyyata götürülüb: “Həmin ailələrlə profilaktik iş aparılmalıdır”.

Şöbə müdiri bildirib ki, münaqişəli ailələr ölkənin bütün regionlarında var, amma çoxu Bakıdadır: “Məişət zorakılığından əziyyət çəkənlər dövlət qurumlarına gec müraciət edirlər. Səbir etməyə üstünlük verirlər. Yalnız vəziyyət ağırlaşandan, qarşı tərəf kəskin zorakılıq hallarına keçəndən sonra dövlət qurumlarına müraciət olunur. Və müraciətlər o vaxt daxil olur ki, artıq ailəni qorumaq, həmin şəxslərin bir yerdə yaşamasını təmin etmək mümkün olmur”.

Taliyə İbrahimova vurğulayıb ki, hər rayonda, şəhərdə, kənddə, qəsəbədə dövlət orqanları bu istiqamətdə profilaktik işi gücləndirməlidir: “Zorakılıq törədən şəxslər qeydiyyata alınmalı və yerli icra hakimiyyəti orqanları onlarla profilaktik iş aparmalıdır”.