Bu hava əkin-biçinə necə təsir edəcək?
Son günlər bir çox bölgədə aprel ayı üçün xarakterik olmayan hava şəraiti müşahidə edilir, bəzi yerlərə hətta qar yağıb. Məsələn, aprelin 2-də Qusarın Ləzə kəndinə güclü qar yağıb. Qarın qalınlığı 4 santimetrə çatıb, temperatur mənfi 5 dərəcəyə enib. Lerik rayonunun mərkəzinə yağan qarın qalınlığı 5-6 santimetr, yüksək dağlıq ərazilərə isə 10 santimetr olub. Şəki və Oğuz rayonlarında da bir çox kənd “ağ örpəyə” bürünüb.
Bəziləri aprel ayında qarlı hava şəraitinin normal olduğunu bildirsələr də, çoxları bu hava şəraitini heç də normal qəbul etməyərək, şaxtalı havanın kənd təsərrüfatı məhsuldarlığını aşağı salacağını vurğulayırlar.
Mövzu ilə bağlı kənd təsərrüfatı eksperti Babək Tatlıyev “Yeni Müsavat”a bildirib ki, adətən qar yağanda el arasında deyirlər “torpaq dincəlir”: “Bu, əsasən qış aylarında, yəni yanvar-fevralda baş verirsə, onda qarın xeyri var. Lakin yazda, xüsusən də ağacların çiçək açdığı zamanda qar yağarsa, bu, ziyan vurur. Çünki yağan qar ya çiçəyi dondurub məhv edir, ya da ki, tökür. Bu da gələcəkdə meyvə qıtlığına səbəb olur. Buna görə də artıq təbiət oyandıqdan sonra qarın və ya dolunun yağması ancaq zərər verir.
Amma düşünmürəm ki, bu günlərdə dağ rayonlarda yağan qar ziyan vursun. Çünki çox güman ki, həmin ərazilərdə ağaclar hələ çiçək açmayıb. Yox, əgər həmin ərazilərdə, xüsusən də aran rayonlarında ağaclar çiçək açmağa başlayıbsa və qar yağıbsa, təbii ki, birmənalı şəkildə zərər verəcək”.
