“İrəli” hərəkatının lideri, sabiq iqtisadiyyat naziri Emmanuel Makron Fransada prezident seçkisi ilə bağlı rəy sorğusunda önə çıxıb. Novator.az-ın məlumatına görə, “Harris İnteractive” şirkətinin sorğusuna qatılan respondentlərin 26%-i ilk turda Makrona səs verəcəyini bildirib.

Martın 6-dan 8-dək keçirilmiş sorğuya 4053 seçici qatılıb.

Sorğuya əsasən, ilk turda Milli Cəbhənin lideri Marin Le Penin 25% səs toplamaq imkanı var.

Sağ və mərkəzçi partiyaların namizədi, sabiq baş nazir Fransua Fiyon respondentlərin 20%-nin dəstəyini alıb.

Respondentlərin 65%-i ikinci turda Makronla Le Pen qarşılaşacağı halda sabiq nazirə dəstək verəcəyini bəyan edib. Sorğuya görə, Makron ikinci turda Fiyonu 59%-lə uda bilər.

Prezident seçkisinin ilk turu aprelin 23-də, ikinci turu mayın 7-də keçiriləcək.