Fuad Əhmədliyə qarşı ittihamlar ağırlaşdırılıb
AXCP-nin həbsdə olan gənc üzvü Fuad Əhmədliyə qarşı ittihamlar ağırlaşdırılıb.
Onun vəkili Əsabəli Mustafayev “Azadlıq” radiosuna deyib ki, martın 6-da Kürdəxanıdakı 1 saylı Bakı İstintaq Təcridxanasında Fuad Əhmədli ilə bağlı istintaq hərəkəti keçirilib və gənc cəbhəçi müdafiəçinin iştirakı ilə yenidən dindirilib: “Fuada əvvəlcə Cinayət Məcəlləsinin 302.1 (əməliyyat-axtarış fəaliyyəti haqqında qanunvericiliyi pozma) və 308.1-ci (vəzifə səlahiyyətlərindən sui-istifadə) maddələri ilə ittiham verilmişdi. Martın 6-da ittihamlar ağırlaşdırıldı, hər iki maddənin 2-ci bəndləri ilə, yəni 302.2 və 308.2-ci maddələrlə yeni məzmunda ittiham verildi. Fuad Əhmədli bir daha dindirildi. İfadənin məzmunu barədə məlumat verə bilmərəm. Yalnız bunu deyə bilərəm ki, Fuad heç bir cinayət törətmədiyini, təqsirsiz olduğunu bildirdi”.
Cəbhəçi fəala verilmiş əvvəlki maddələrin birində 2, o birisində isə 3 ilədək həbs cəzası nəzərdə tutulurdu. Yeni ittihamların sanksiyasında 8 ilədək cəza var.
Fuad Əhmədli ötən il avqustun 18-də Bakıda saxlanıb. Bir qədər sonra onun işi həbsdə olan AXCP sədrinin köməkçisi, “Azadlıq” qəzetinin maliyyə direktoru Faiq Əmirlinin işi ilə bir icraatda birləşdirilib. Faiq Əmirli ötən il avqustun 20-də Bakıda tutulub. İstintaq onu ABŞ-da yaşayan türkiyəli ilahiyyatçı Fətullah Gülənin rəhbərlik etdiyi “Hizmət hərəkatı”nın nümayəndəsi kimi təqdim edir, dini düşmənçiliyin salınması, dini məzhəbləri yaymaq adı altında vətəndaşların hüquqlarını pozan qrup təşkil etməkdə günahlandırır.
AXCP hər iki həbsin siyasi xarakterli olduğunu bəyan edir. Rəsmi şəxslər bu iddiaları rədd edirlər.
