İtirilmiş sənədləri tapan xidmət yaradılıb
Nəqliyyat, Rabitə və Yüksək Texnologiyalar Nazirliyi “Poçtap” xidməti istifadəyə verib. Novator.az bildirir ki, “Azərpoçt” MMC-nin reallaşdırdığı “Poçtap” itirilmiş sənədlərin tapılaraq sahibinə qaytarılması ilə məşğul olur.
Xidmət çərçivəsində tapılmış sənədləri aidiyyəti üzrə poçt müəssisələri qəbul edir, sahibləri axtarılır, tapıldığı halda sənədlər sahiblərinə, əks təqdirdə aidiyyəti orqana verilir.
Şəxs təsadüfən tapdığı sənədi istənilən poçt qutusuna ata və ya istənilən poçt şöbəsinə, eləcə də “Şəbəkə” xidmət mərkəzlərinə anonimliyini qorumaq şərti ilə təhvil verə bilər. Poçta daxil olmuş sənəd müvafiq proqramda qeydiyyata alınmaqla avtomatik şəkildə sənəd sahibinin əlaqə məlumatları axtarılır və tapıldığı təqdirdə telefon mərkəzi əməkdaşı həmin şəxslə əlaqə yaradır.
Sənədini itirmiş şəxs “Poçtap” xidmətinin rəsmi internet səhifəsindən ( www.pochtap.az), 169 saylı telefon mərkəzindən və ya istənilən poçt şöbəsindən sənədinin tapılıb-tapılmadığını öyrənə bilər və tapılmadığı təqdirdə itirilən sənədi axtarışa verə bilər. www.pochtap.az internet səhifəsində “Sənədimi itirmişəm” bölməsini seçməklə müvafiq xanalara zəruri məlumatları daxil edib itirilən sənəd barədə elan yerləşdirmək mümkündür.
İtirilən sənədlə bağlı “Poçtap” xidmətinin bazasında məlumatın olması, sənədin hazırkı statusu, hansı poçt filialı və şöbəsində olması, saxlama müddəti ilə bağlı məlumat almaq üçün “Axtar” bölməsindən istifadə etmək olar.
Sənədi tapılan şəxs onu sənədinin mövcud olduğu filialdan əldə edə və ya telefon mərkəzinə müraciət edərək özünə yaxın poçt şöbəsinə çatdırılmasını sifariş edə bilər. Sənədin poçt müəssisələrində saxlanılma müddəti 10 gündür. Bu müddət 1 ayadək uzadıla bilər.
“Poçtap” xidməti çərçivəsində sənədi tapılan şəxslər 1 manat 80 qəpik xidmət haqqı ödəyərək sənədi poçt şöbələrindən və “Şəbəkə” xidmət mərkəzlərindən təhvil ala bilər. Sənədin hansısa ünvana çatdırılması lazım gəldikdə isə çatdırılma rüsumu “Azərekspresspoçt”un xidmət tariflərinə uyğun hesablanır.
