Rusiyalı mütəxəssislər raket daşıyıcılarının fəzaya buraxılşı prosesinin ətraf mühitə təsiri ilə bağlı açıqlama yayıblar.

Novator.az-ın məlumatına görə, Rusiya Kosmonavtika Akademiyasının üzvü Valeri Klyuşnikov deyib ki, raket daşıyıcıları göyə buraxılanda Yerə ciddi ekoloji ziyan dəyir. O bildirib ki, kosmik aparat işə düşəndə raket yanacağı ətrafa çoxlu zəhər, tullantı buraxır.

Klyuşnikov vurğulayıb ki, raket daşıyıcıları ətraf mühitə sənaye müəssislərindən çox ziyan vurur.

Kosmik aparat işə düşəndə yanacağın buraxdığı zəhər və digər tullantılar uçuş ərazisi boyu yayılır və tez bir zamanda atmosferə yayılır. Raket havaya qalxanda ətrafa azot oksidləri və karbon səpələnir. Əgər raket daşıyıcısı sərt yanacaqla işləyirsə, onda bu tullantılara hidrogen xlorid, xlor və alüminium oksidi də əlavə olunur. Ona görə də alimlər hesab edirlər ki, sərt yanacaqla işləyən raketlər ətraf mühitə digər raketlərdən çox ziyan vurur. Çünki xlor birləşmələri və azot oksidi ozon qatının dağılmasına təsir göstərir. Amma bir problem də ondadır ki, sərt yanacaqlı raketlər təhlükəsizlik baxımından daha etibarlı sayılır.