Müşfiqin büstünü sökdürən məmur işdən çıxarıldı
Şair Mikayıl Müşfiqin Bakıdakı büstünün çıxarılması üç məmurun cəzalandırılması ilə nəticələnib. “Azəravtoyol” ASC-dən AZƏRTAC-a bildiriblər ki, Yasamal rayonu ərazisində, İnşaatçılar və Nərimanov prospektlərinin kəsişməsində (Statistika dairəsi) aparılan yenidənqurma işləri zamanı 8 saylı Xüsusi Təyinatlı Yol İstismarı MMC-nin iş icraçısı “Azəravtoyol” ASC-nin rəhbərliyinə və çalışdığı MMC-nin direktoruna məlumat vermədən Mikayıl Müşfiqin ərazidə yerləşən büstünü çıxarıb: “Üzərinə düşən əmək funksiyasını lazımi qaydada yerinə yetirməyərək kobud qanun pozuntusuna yol verdiyinə görə MMC-nin iş icraçısı Rəhimov Ramiz Tapdıq oğlu tutduğu vəzifədən azad edilib.
Həmçinin müəyyən edilib ki, 8 saylı Xüsusi Təyinatlı Yol İstismarı MMC-nin baş mühəndisi və direktoru layihədə nəzərdə tutulan işlərə nəzarəti lazımi qaydada həyata keçirməyiblər. Buna görə də MMC-nin direktoru Şirinov Əliheybət Balakişi oğluna xəbərdarlıq edilib, baş mühəndis Hüseynov Yuris Xələf oğluna isə töhmət verilib.
“Azəravtoyol” ASC görkəmli şair Mikayıl Müşfiqin büstünün çıxarılması ilə bağlı ictimaiyyətə və KİV-ə vaxtında məlumat verilməməsi nəticəsində yaranan haqlı narahatlığa görə üzr istəyir”.
1908-ci ildə Bakı şəhərində doğulmuş (əslən xızılıdır) Mikayıl Müşfiq (Mikayıl İsmayılzadə) 1938-ci ildə repressiya qurbanı olub.
