Azərbaycana gələnlərin sayı 12,1 faiz artıb
Dövlət Statistika Komitəsi Azərbaycan Respublikasına ötən il gəlmiş xarici vətəndaşların sayını açıqlayıb. Novator.az-ın məlumatına görə, açıqlamada qeyd olunur ki, 2016-cı ildə ölkəyə gəlmiş əcnəbilərin sayı əvvəlki illə müqayisədə 12,1 faiz artaraq 2 milyon 248,8 min nəfər olub. Azərbaycana səfər edənlərin 33,1 faizi Rusiya, 22,5 faizi Gürcüstan, 14 faizi Türkiyə, 11,1 faizi İran, 19,3 faizi isə digər ölkələrin vətəndaşlarıdır.
2015-ci il ilə müqayisədə 2016-cı ildə ölkəyə gələn İraq vətəndaşlarının sayı 30 dəfə, Birləşmiş Ərəb Əmirlikləri vətəndaşlarının sayı 22 dəfə, Səudiyyə Ərəbistanı vətəndaşlarının sayı 10,2 dəfə, Qətər vətəndaşlarının sayı 5,5 dəfə, İran vətəndaşlarının sayı 66,2 faiz, Misir vətəndaşlarının sayı 51,8 faiz, Çin vətəndaşlarının sayı 44,5 faiz artıb.
Ötən il Avropa İttifaqına üzv ölkələrdən gəlmiş vətəndaşların sayı 16,6 faiz azalaraq 91,1 min nəfər, MDB ölkələrindən gələnlərin sayı isə 8,1 faiz artaraq 868 min nəfər olub.
