Zəhərlənmə statistikası
Fevralın 23-ü Respublika Toksikologiya Mərkəzində illik hesabata dair mətbuat konfransı keçirilib. AZƏRTAC-ın məlumatına görə, Səhiyyə Nazirliyinin baş toksikoloqu Azər Maqsudov deyib ki, ötən il mərkəzə 2200 xəstə qəbul olunub: “800 nəfər dərmandan, 500 nəfər dəm qazından, 300 nəfər yandırıcı məhluldan (əsasən sirkə turşusundan) zəhərlənib. 90 xəstə ilan zəhəri, 250 nəfər kəskin allergik reaksiya ilə müraciət edib. Allergiya ilə bağlı verilən məsləhətlərin sayı 2015-ci illə müqayisədə 2,5-3 dəfə artıb.
Toksikoloji səbəblərdən ölüm hallarında 2015-ci illə müqayisədə azalma müşahidə olunur. 2015-ci ildə 68, 2016-cı ildə isə 52 nəfər bu səbəbdən dünyasını dəyişib. Ölüm hallarının 80-90 faizi sirkə turşusu, psixotrop və narkotik təsirli dərmanlar, antidepresantların istifadəsi nəticəsində baş verib, bunların 30 faizi intiharlardır. Dərman preparatları ilə zəhərlənənlər 20-50 yaş arası, sirkə turşusu ilə isə 40-80 yaş arası olan şəxslərdir”.
