İqtisadiyyat Nazirliyinin Sahibkarlığa Kömək Milli Fondu fevralın 23-ü Xaçmaz rayonunun Xudat şəhərində işgüzar forum keçirib. Forum zamanı Quba-Xaçmaz iqtisadi rayonundakı bəzi sahibkarlıq subyektlərinə 365 min manat güzəştli kredit verilib. Rəsmi məlumata görə, kreditlər əsasən heyvandarlıq, bağçılıq, tərəvəzçilik sahələrinin inkişafına yönəldiləcək, bu hesaba 30-a yaxın yeni iş yerinin açılması mümkün olacaq.

90-a yaxın sahibkarın iştirak etdiyi forumda çıxış edən Sahibkarlığa Kömək Milli Fondunun icraçı direktoru Şirzad Abdullayev deyib ki, indiyədək Quba-Xaçmaz iqtisadi rayonunda fəaliyyət göstərən sahibkarlıq subyektlərinin 2300-dən çox investisiya layihəsinə 184,2 milyon manat güzəştli kredit ayrılıb.