“Bunun nə dərəcədə düzgün olduğunu sonrakı tədqiqatlar göstərəcək”
Amerikalı və belçikalı astronomlar Dolça bürcündə Yerə bənzər 7 ekzoplanetdən ibarət sistemin aşkarlandığı barədə bəyanatla çıxış ediblər.
AZƏRTAC “Euronews” telekanalına istinadla xəbər verir ki, fevralın 22-də NASA-nın elmi bölməsinin rəhbəri Tomas Surbuhen TRAPPIST-1 adlanan tənha ulduzun ətrafında dövr edən bu planetlərdə yaşayış üçün əlverişli şəraitin olması ehtimalını irəli sürüb. Bu ekzoplanetlərdən 3-ü səthində maye şəkilli suyun toplana biləcəyi “həyat zonasında” yerləşir və əlverişli atmosfer şəraitində onların hər birində su ola bilər. Ekzoplanetlər Yer kürəsindən 39 işıq ili məsafəsində aşkar olunub.
Yaxın 5 ildə alimlər bu ekzoplanetləri, o cümlədən onların atmosfer qatını daha ətraflı öyrənmək niyyətindədir. Bunun üçün gələn ilin oktyabrında fəzaya göndəriləcək ən yeni “Ceyms Uebb” teleskopundan istifadə ediləcək.
AMEA-nın Şamaxı Astrofizika Rəsədxanası NASA alimlərinin Yer ölçüsündə 7 planetin kəşf edilməsi ilə bağlı yaydığı məlumata münasibət bildirib.
Rəsədxana direktoru Namiq Cəlilov APA-ya deyib ki, aşkarlanan planetlərdən 3-ü kütləsi və radiusuna görə Yerə kürəsinə oxşayır. O qeyd edib ki, həmin obyektlərin atmosferi, onların tərkibi haqda hələlik bir şey demək mümkün deyil: “Zəif obyektlər olduğundan onları Yerdən müşahidə etmək çox çətindir. NASA-nın imkanları böyük olduğu üçün arası kəsilmədən o cür obyektləri müşahidə edib belə nəticələr əldə edir. Yalnız sonrakı tədqiqatlar bu məlumatların nə dərəcədə düzgün olduğunu göstərəcək. Çünki bu vaxta qədər minlərlə bu tipli obyekt aşkarlansa da, onlarda həyat üçün tələb olunan iz, spektr tapılmayıb”.
