Rusiyada Donetsk və Luqansk sorğusu
Ümumrusiya İctimai Rəyi Öyrənmə Mərkəzi Ukraynada yaradılmış separatçı rejimlərə münasibəti öyrənib. Novator.az-ın məlumatına görə, fevralın 5-6-sı telefonla 1200 rusiyalının rəyi öyrənilib.
Fevralın 20-də açıqlanan nəticələrə görə, rəyi öyrənilənlərin 24%-i Donetsk və Luqansk rejimlərinin “müstəqilliyini” tanımağa tərəfdar olub. 18% bu bölgələrin Rusiyanın tərkibinə daxil olmasını təklif edib. 8% bölgələrə geniş muxtariyyət verilməsinə tərəfdar çıxıb.
Rəyi öyrənilənlərin 4%-i Donetsk və Luqanskda vəziyyətə tam nəzarət etməsi üçün Ukrayna hökumətinə yardım etməyə çağırıb. 36% isə bu məsələdə neytrallığı seçib.
2014-cü ilin fevralında Ukraynada hakimiyyət xalq üsyanı ilə dəyişib, Rusiyaya yaxın qüvvələri Qərb meylli qüvvələr əvəzləyib. Bundan dərhal sonra Rusiya Ukraynanın Krım bölgəsini hərbi güclə tutaraq özünə birləşdirib və Donbasda iki separatçı rejimin əli ilə bu bölgənin bir hissəsini işğal edib. Həmin vaxtdan bəri münaqişədə 9 min 800-dək adam həlak olub.
Fevralın 18-də Rusiya prezidenti Vladimir Putin Donetsk və Luqansk rejimlərinin əhaliyə verdiyi pasportların Rusiyada tanınması barədə sərəncam imzalayıb.
