Ekologiya və Təbii Sərvətlər Nazirliyində iclas: müəssisə rəhbərlərinə xəbərdarlıq edilib
Ötən həftə Ekologiya və Təbii Sərvətlər Nazirliyində kollegiya iclası keçirilib.
Nazir Hüseyn Bağırovun sədrliyi ilə keçirilən iclasda “Azərbaycan Yaşıllaşdırma və Landşaft Quruluşu” ASC-nin və Meşələrin İnkişafı Departamentinin hesabatları dinlənib. Yaşıllaşdırma sahəsində, meşələrin mühafizə və bərpasında, artırılmasında kənd təsərrüfatı əhəmiyyətli kol və bitkilərin, aqromeşə sahələrinin salınması istiqamətində aparılan işlərin nəticələri təhlil edilib, müvafiq tapşırıqlar verilib və 10 gün müddətində yenidən müzakirəyə çıxarılması qərara alınıb.
Daha sonra Ətraf Mühitin Mühafizəsi Departamentinin direktoru ötən ilin yekunları ilə bağlı məlumat verib. Müsbət nəticələrlə yanaşı, nöqsanlar da qeyd olunub, o cümlədən ətraf mühitin mühafizəsi sahəsində bir sıra ərazi idarələrinin fəaliyyətinə irad bildirilib. Bütün ərazi idarələrinə ekoloji qanun pozuntuları ilə daha ciddi mübarizə aparılması üçün müddətli göstəriş verilib. Bununla yanaşı, kollegiya iclasının qərarı ilə işlərində yol verdikləri nöqsanlara görə ərazi ekologiya və təbii sərvətlər şöbələrinin, meşə mühafizəsi və bərpası müəssisələrinin rəhbərlərinə xəbərdarlıq edilib.
Kollegiya üzvləri nöqsanlara yol vermiş müəssisə rəhbərlərinin izahatlarını qəbul edib. Qısa müddət ərzində nöqsanların aradan qaldırılması üçün departament və tabeli qurumlarının rəhbərlərinə konkret tapşırıqlar verilib.
