İlin ilk rəqəmi: inflyasiya 12 faizə yaxınlaşıb
2017-ci ilin ilk iqtisadi göstəriciləri açıqlanıb. Novator.az-ın məlumatına görə, Dövlət Statistika Komitəsi bildirir ki, yanvar ayında istehlak məhsullarının və xidmətlərin qiymətləri 2016-cı ilin yanvar ayına nisbətən 11,9 faiz artıb. Ərzaq məhsulları 14,5 faiz, qeyri-ərzaq məhsulları 12,3 faiz, əhaliyə göstərilən ödənişli xidmətlər 8 faiz bahalaşıb.
2016-cı ilin dekabr ayına nisbətən istehlak məhsullarının və xidmətlərin qiymətləri 2,3 faiz, o cümlədən ərzaq məhsullarının qiymətləri 2,8 faiz, qeyri-ərzaq məhsullarının qiymətləri 2 faiz, əhaliyə göstərilən ödənişli xidmətlərin qiymətləri isə 1,9 faiz qalxıb.
Başqa bir rəsmi hesabata əsasən, 2017-ci ilin yanvar ayında pərakəndə ticarət şəbəkəsində satılmış məhsulların dəyəri əvvəlki ilin eyni ayının səviyyəsini müqayisəli qiymətlərlə 1,3 faiz üstələyərək 2,6 milyard manata bərabər olub. İstehlakçılara 1,3 milyard manatlıq və ya 2016-cı ilin yanvar ayına nisbətən real ifadədə 0,8 faiz çox ərzaq məhsulları, içkilər və tütün məmulatları, 1,7 faiz çox qeyri-ərzaq məhsulları satılıb.
