Məişət zorakılığı ilə bağlı məlumat bankında nələr var?
Məişət zorakılığı ilə bağlı məlumat bankına daxil olan bilgilərə görə, Azərbaycanda zorakılığa məruz qalanların 85,5 faizi qadınlar, 14,5 faizi kişilərdir. Ailə, Qadın və Uşaq Problemləri üzrə Dövlət Komitəsinin informasiya və analitik araşdırmalar şöbəsinin müdiri Elgün Səfərov AZƏRTAC-a müsahibəsində belə deyib.
Şöbə müdirinin sözlərinə görə, məişət zorakılığı ilə bağlı məlumat bankı 2015-ci ildə yaradılıb: “2015-ci ildə banka 346, 2016-cı ilin ilk yarısında 184 fakt daxil edilib. Ümumilikdə banka daxil olan 530 məişət zorakılığı faktı təhlil olunub və müəyyən edilib ki, zorakılığa məruz qalan kişilərin 9,2 faizi yetkinlik yaşına çatmayan oğlanlar, 3,2 faizi qocalar, 2,1 faizi isə 25-45 yaşlı kişilərdir”.
Elgün Səfərov bildirib ki, fiziki zorakılığa məruz qalanlar arasında 25-34 yaşlı kişilərin sayı çox azdır: “Bu yaşda olan kişilər əsasən psixoloji zorakılığa məruz qalır. Statistikaya görə, 99 faiz psixoloji və seksual zorakılıq halları ilə bağlı məlumatlar acıqlanmır. Zorakılığa məruz qalan əksər insanlar dövlət orqanlarına müraciət edəndə bəzi məsələlərin bağlı qalmasını istəyirlər.
Məişət zorakılığını törədən şəxslərin 40,3 faizi işsiz insanlar, 34 faizi fəhlə, 1 faizi müəllim, 22,7 faizi fərdi əməklə məşğul olanlar, 2 faizi təqaüdçülərdir. Zorakılıq törədən şəxslərin 91,9 faizi orta, 3,2 faizi ilk peşə ixtisas, 3,8 faizi orta ixtisas, 1,1 faizi ali təhsillidir.
Ən çox məişət zorakılığına məruz qalanlar valideyn himayəsindən məhrum olan uşaqlar və evdar qadınlardır. Məişət zorakılığına məruz qalanların 74,3 faizi evli, 25,7 faizi subaydır”.
