“Priceof Travel” təşkilatı Avropanın ən ucuz turizm məkanlarının adlarını açıqlayıb. Novator.az-ın məlumatına görə, ucuz şəhərlərin reytinq cədvəlinə Bolqarıstanın paytaxtı Sofiya başçılıq edir.

Reytinq müəllifləri meyar kimi ucuz, amma yaxşı vəziyyətdə olan oteldə qalmağın, gündə üç dəfə yeməyin, şəhər nəqliyyatında iki gedişin, muzeyə biletin, üç parç ucuz pivənin və ya digər əyləncənin qiymətini götürüblər.

2017-ci ilin reytinq cədvəlinə liderlik edən Sofiyada turistin birgünlük xərci 24,04 ABŞ dolları təşkil edir.

Reytinq müəlliflərinin hesabatına görə, bu il Sofiyada turistin oteldə səhər yeməyi də daxil olmaqla bir gecə qalması 6,25 dollara, nəqliyyatdan istifadəsi 1,09 dollara, yeməyi 9,17 dollara, içki və əyləncəsi 4,09 dollara, muzeyə baş çəkməsi 3,28 dollara başa gəlib.

Reytinq cədvəlində sonrakı yerlərdə Krakov (Polşa), Buxarest (Rumıniya), Belqrad (Serbiya), Budapeşt (Macarıstan), Sarayevo (Bosniya və Herseqovina) gəlir.

Ötən ilin reytinq cədvəlində birinci olmuş Ukrayna paytaxtı Kiyev bu il yeddinci yerdə qərarlaşıb.