Yanğın işində final: hökm oxundu
Bakı Ağır Cinayətlər Məhkəməsi paytaxtın Binəqədi rayonundakı çoxmərtəbəli yaşayış binasında 2015-ci il mayın 19-da baş verən, 15 nəfərin ölümü ilə nəticələnən yanğın hadisəsi ilə prosesi yekunlaşdırıb. Cinayət işi yanğın təhlükəsizliyi qaydalarını pozma ehtiyatsızlıqdan zərərçəkmiş şəxsin ölümünə və digər ağır nəticələrə səbəb olduqda, vəzifə səlahiyyətlərindən sui-istifadə ağır nəticələrə səbəb olduqda, vəzifə saxtakarlığı ittihamları ilə aparılıb.
Yanvarın 27-də çıxarılan hökmlərlə “Global Construction” MMC-nin təsisçisi və idarə heyətinin sədri Miryusif Mahmudov 3 il rəhbər vəzifə tutmaq hüququndan məhrum edilməklə 8 il, binaların üzlənməsində istifadə olunan poliuretan məmulatını istehsal edən “Qlobal Stone” MMC-nin baş direktoru Uğur Bəşirov 5 il, “Global Construction” MMC-nin idarə heyətinin sədr müavini Ələkbər Əsgərov, Binəqədi Rayon İcra Hakimiyyəti başçısının sabiq birinci müavini Qəzənfər Novruzov, 2012-2013-cü illərdə Binəqədi rayon Mənzil Kommunal Təsərrüfat Birliyinin rəisi işləmiş rayon icra hakimiyyətinin təsərrüfat şöbəsinin müdiri Ədalət Rəcəbov 4 il, Binəqədi rayonu, 72 saylı Mənzil Kommunal İstismar Sahəsinin rəisi Nizami Orucov 3 il 6 ay azadlıqdan məhrum edilib.
Poliuretan məmulatlarının sınaq yoxlamalarını keçirən “Dərnəgül Boru Zavodu” Qapalı Səhmdar Cəmiyyətinin sınaq laboratoriyasının müdiri Ağacavad Məmmədov və Səhiyyə Nazirliyinin Gigiyena və Epidemiologiya Mərkəzinin baş direktoru Akif Əlibəyov şərti iş alıblar.
