Təbiət necə qorunub? (Rəsmi hesabat)
Ekologiya və Təbii Sərvətlər Nazirliyi 2016-cı ildə bioloji müxtəlifliyin qorunması istiqamətində aparılan işlərin hesabatını yayıb. Novator.az-ın məlumatına görə, hesabatda qeyd olunur ki, ölkədə ümumi sahəsi 892546,49 hektar olan xüsusi mühafizə olunan təbiət əraziləri, o cümlədən 9 milli park, 11 dövlət təbiət qoruğu və 24 dövlət təbiət yasaqlığı fəaliyyət göstərir. Ümumilikdə xüsusi mühafizə olunan təbiət əraziləri ölkə ərazisinin 10,3%-ni, o cümlədən milli parklar 3,7%-ni təşkil edir.
2016-cı il ərzində xüsusi mühafizə olunan təbiət ərazilərində və ovçuluq təsərrüfatlarında qanunu pozanlara qarşı 979 ədəd akt və 270 ədəd protokol tərtib edilib. Təbiətə dəymiş ziyan 68366,72 manat məbləğində müəyyən olunub, inzibati qaydada 189538 manat cərimə tətbiq edilib. 28 iş hüquq mühafizə orqanlarına, 130 iş isə rayon məhkəmələrinə və icra bölmələrinə göndərilib.
İl ərzində qanunsuz ovla bağlı xüsusi mühafizə olunan təbiət ərazilərində və ovçuluq təsərrüfatlarında brakonyerliklə məşğul olan şəxslərə qarşı 93 akt və 91 protokol tərtib edilərək onlardan 79 ədəd ov silahı və 303 ədəd patron götürülüb. Həmin şəxslərə 89950 manat məbləğində cərimə tətbiq edilib və 2727,50 manat iddia qaldırılıb.
İl ərzində milli parklara 3081 nəfər xarici, 196449 nəfər yerli vətəndaş olmaqla ümumilikdə 199530 nəfər turist gəlib.
Ovçuluq Təsərrüfatlarının İdarə Edilməsi və Ovçuluq Fəaliyyətinə Dövlət Nəzarəti Xidməti 96 akt və protokol tərtib edib, ümumilikdə 49263,5 manat məbləğində iddia və cərimə tətbiq olunub.
