Rusiyada siqaret çəkənlərin sayı 4 ildə 10% azalıb
Rusiya əhalisinin 32%-i siqaret çəkir. Novator.az-ın məlumatına görə, Ümumrusiya İctimai Rəyi Öyrənmə Mərkəzinin keçirdiyi sorğu belə göstərir.
Sorğunun nəticələrinə əsasən, siqareti daha çox kişilər çəkir. Onların 48%-i siqaretə vərdiş etdiklərini bildirir. Respondentlərin beşdə biri siqareti tərgitdiyini vurğulayır.
Ümumrusiya İctimai Rəyi Öyrənmə Mərkəzi siqaretlə bağlı sorğunu yanvarın 20-22-də 1800 respondent arasında telefon müsahibəsi üsulu ilə keçirib.
Sorğunun nəticələri göstərir ki, ölkədə siqaret çəkənlərin sayı 2016-cı illə (31%) müqayisədə elə də dəyişməyib. Ümumilikdə isə Rusiyada 2013-cü ildən (41% siqaret çəkib) bəri siqaretə qarşı keçirilən kampaniyalardan sonra siqaret çəkənlərin sayı 10%-ə qədər azalıb.
20-22 yanvar sorğusu göstərir ki, respondentlərin 19%-i gündə bir qutu, 10%-i bir gündə bir neçə ədəd, 3%-i isə həftədə və ya ayda bir-iki ədəd siqaret çəkir.
