Nazir pensiya artımının detallarından danışıb
Əmək və əhalinin sosial müdafiəsi naziri Səlim Müslümov yanvarın 24-də mətbuat konfransı keçirib. O, dövlət başçısının yanvarın 21-də imzaladığı əmək pensiyalarının sığorta hissəsinin indeksləşdirilməsi sərəncamından irəli gələn məsələlərdən söz açıb.
Rəsmi məlumata görə, Müslümov qeyd edib ki, sərəncama əsasən, Dövlət Sosial Müdafiə Fondu 2016-ci il üzrə istehlak qiymətləri indeksinə uyğun olaraq yanvarın 1-nə bütün növ əmək pensiyalarının sığorta hissəsinin indeksləşdirilməsini təmin etməlidir: “Ötən il istehlak qiymətlərinin 12,4 faizlik indeksi qeydə alınıb. Dövlət başçısının 21 yanvar sərəncamı ilə sığortaolunanlar üzrə ödənilən və onların fərdi hesablarında qeydə alınan pensiya kapitallarının da indeksləşdirilməsi aparılacaq. Əmək pensiyalarının sığorta hissəsinin indeksləşdirilməsinə hər ay təqribən 10,21 milyon manat, il ərzində isə 122,5 milyon manat əlavə vəsait yönəldiləcək.
Ümumilikdə pensiyaların sığorta hissəsinin artırılması prosesi pensiyaçıların 94 faizinə və ya 1 milyon 240 min nəfərə şamil olunacaq. Vətəndaşların əmək pensiyalarının sığorta hissəsini təşkil edən məbləğlər müxtəlif olduğundan bu artımların məbləğləri də fərqli olacaq”.
Nazir vurğulayıb ki, fevral ayının pensiyalarının ödənişi onların sığorta hissəsinin yanvar və fevral aylarındakı artımları ilə birlikdə həyata keçiriləcək.
Müslümov bildirib ki, Azərbaycanda əmək pensiyaçılarının sayı ötən il 16,1 min nəfər və ya 1,24 faiz artaraq 1 yanvar 2017-ci ilə 1 milyon 316 min nəfər olub.
Prezidentin minimum aylıq əməkhaqqının artırılması haqqında 21 yanvar sərəncamına toxunan nazir deyib: “Sərəncama əsasən, minimum aylıq əməkhaqqının məbləği 116 manat müəyyən edilib. Əmək və Əhalini Sosial Müdafiəsi Nazirliyinin əmək müqavilələri bildirişi üzrə elektron informasiya sisteminə daxil edilmiş məlumatlara görə, bu artımın təqribən 146 min nəfərə şamil olunacağı, nəticədə artımın şamil olunduğu şəxslərin illik gəlirlərinin 40,3 milyon manata qədər artacağı gözlənir. Minimum aylıq əməkhaqqının təqribən 10,47% artımı sahibkarlıq fəaliyyəti ilə məşğul olan fiziki şəxslərdən məcburi dövlət sosial sığortası üzrə daxilolmaların 2017-ci ildə 12,4 milyon manat artacağını proqnozlaşdırmağa əsas verir”.
