Avropa Parlamentinə yeni sədr seçilib. Novator.az-ın məlumatına görə, yanvarın 17-də keçirilən səsvermədə bu post Avropa Xalq Partiyası fraksiyasından italyan Antonio Tayaniyə qismət olub. O, 351 deputatın səsini alıb. Avropa sosialistlərinin namizədi Canni Pitella 282 səs alıb.

Avropa Parlamentinin sədri iki il yarım müddətinə seçilir. Yanvarın 17-dək sədr postunu alman sosial demokrat Martin Şults tuturdu.

Antonio Tayani 1953-cü ildə Romada doğulub. Hüquqşünasdır, mətbuatda və radioda çalışıb, baş nazirin (Silvio Berluskoni dönəmlərinin birində) mətbuat katibi olub.

Avropa Parlamentinə ilk dəfə 1994-cü ildə seçilib. Avropa İttifaqının nəqliyyat komissarı, sənaye və sahibkarlıq komissarı olub.