Əsgərin meyitinin qaytarılması müzakirə olunub
Əsir və İtkin Düşmüş, Girov Götürülmüş Vətəndaşlarla Əlaqədar Dövlət Komissiyasının sədri, Dövlət Təhlükəsizliyi Xidmətinin rəisi general-leytenant Mədət Quliyev Beynəlxalq Qızıl Xaç Komitəsinin (BQXK) Azərbaycandakı nümayəndəliyinin rəhbəri Elena Aymone Sessera ilə görüşüb. Prezident İlham Əliyevin göstərişi ilə keçirdiyi görüşdə Mədət Quliyev 2016-cı il dekabrın 29-da həlak olmuş Azərbaycan əsgəri Qurbanov Çingiz Salman oğlunun meyitinin qaytarılması ilə bağlı məsələni qaldırıb.
Mədət Quliyev qeyd edib ki, Azərbaycan-Ermənistan sərhədində baş vermiş silahlı insidentdə şəhid olan hərbçinin meyitinin qaytarılmaması Ermənistanın beynəlxalq humanitar hüquq normalarını, insan hüquqlarını, həmçinin Ermənistanın özünün də qoşulduğu 12 avqust 1949-cu il tarixli Cenevrə Konvensiyalarının öhdəliklərini kobud şəkildə pozması deməkdir: “Əvvəllər də belə hallara yol verildiyini və meyitləri uzun müddət saxlamaq kimi qeyri-humanist hərəkətin Ermənistanda artıq tendensiyaya çevrildiyini nəzərə alaraq dövlət komissiyası aidiyyəti beynəlxalq təşkilatları bu cür halların qarşısının alınmasına və Cenevrə Konvensiyalarına əməl olunmasını Ermənistandan ciddi şəkildə tələb etməyə çağırır”.
Elena Aymone Sessera deyib ki, Çingiz Qurbanovun meyitinin tezliklə geri qaytarılması üçün BQXK-nın Azərbaycandakı və Ermənistandakı nümayəndəlikləri birgə səylərini davam etdirir.
