Belçikalılar islam barədə nə düşünür? (Sorğunun nəticələri)
Belçika əhlinin 60%-i islam dininin Avropa dəyərlərinə uyğun olmadığını düşünür. Novator.az-ın məlumatına görə, “Soir” qəzeti, RTBF teleradio şirkəti, “Survey&Action” institutu və “Ceci n’est pas une crise” fondunun birgə sorğusu bunu göstərir.
Sorğunun nəticələri yanvarın 9-da “Premiere” radiosunun efirində açıqlanıb. Radionun səhər proqramının aparıcısı deyib: “Acı həqiqət: tədqiqat göstərir ki, Belçikada müsəlmanlarla qeyri-müsəlmanların birgə yaşayışı alt-üst olub. Belçikalıların 60%-i hesab edir ki, cəmiyyətimiz üçün təhlükə məhz islamdır”.
Birgə sorğunun nəticələrinə istinad edən radio aparıcısının sözlərinə görə, Belçika vətəndaşı olan hər 10 müsəlman respondentdən 7-si hesab edir ki, bu ölkədə onlara əcnəbi kimi münasibət göstərilir.
“Soir” qəzetinin elektron versiyasındakı sitatda isə qeyd olunur ki, respondentlərin 29%-i onlar üçün islam qanunlarının Belçika qanunları qarşısında prioritet olduğunu bildirib. Sorğu iştirakçılarının 77%-i vətəndə özlərini əvvəlki kimi rahat hiss etmədiklərini, 65%-i isə qaçqın axınının onlarda qorxu yaratdığını vurğulayıblar. Respondentlərin 70%-i nizam-intizam yaratmaq uşun güclü hakimiyyətin olmasını arzulayıb.
“Soir” qəzetinin məlumatına görə, Belçikanın adi vətəndaşları hesab edir ki, krallıq əhalisinin 30%-ni müsəlmanlar təşkil edir. Rəsmi məlumata görə isə ölkədə müsəlmanların sayı 8,5%-i aşmır.
Sorğuya 2400 adam, o cümlədən 400 müsəlman cəlb edilib.
