Azərbaycanda “Facebook” istifadəçilərinin sayı 20 faizə yaxın artıb
Azərbaycanda “Facebook” istifadəçilərinin sayı 2,3 milyona çatıb. AZƏRTAC sosial şəbəkənin ölkələr üzrə istifadəçi sayı barədə statistikasına əsasən belə məlumat verir.
“GlobalStats” şirkətinin təqdim etdiyi məlumatlara görə, “Facebook” Azərbaycanda ən böyük paya sahib sosial şəbəkədir. 2015-ci ilin dekabrı ilə müqayisədə 2016-cı ilin sonuna ölkədə “Facebook” istifadəçilərinin sayı 19,95 faiz artıb. Bu sosial şəbəkənin Azərbaycanda əhatəsi 91,55 faizə bərabərdir. İkinci yerdə 2,77 faizlə “Twitter”, üçüncü pillədə isə 1,86 faizlə “Vkontakte” sosial şəbəkəsi dayanır.
Azərbaycanda digər sosial şəbəkələr üzrə də artım qeyd alınıb. 2015-ci ilin dekabrı ilə müqayisədə ötən ilin sonuna Azərbaycanda “Youtube” portalının payı 5 faiz yüksəlib. Həmçinin “Linkedİn” platformasının ölkədə əhatəsi artaraq 1,50 faizə yaxınlaşıb.
Ölkədə mobil cihazlardan istifadə də yüksəlir. 2015-ci ilin dekabrında kompüterlərin payı 50,6 faiz, mobil cihazların payı 49,4 faiz olduğu halda 2016-cı ilin dekabrında bu göstəricilər müvafiq olaraq 45,55 və 54,44 faizə çatıb.
