Valyuta hərraclarında satılan vəsaitin həcmi açıqlanıb
Dövlət Neft Fondu dekabr ayında valyuta hərraclarında satdığı vəsaitin həcmini açıqlayıb. Novator.az-a verilən rəsmi məlumata görə, ilin sonuncu ayında satılan vəsait 246 milyon ABŞ dolları təşkil edib.
Son iki ildə ABŞ dollarının rəsmi məzənnəsi 78 qəpikdən 1 manat 77 qəpiyədək artıb. Mərkəzi Bankın 21 fevral 2015-ci il qərarı ilə ABŞ dollarının rəsmi məzənnəsi 1 manat 5 qəpik müəyyən edilib. 21 dekabr 2015-ci ildən isə üzən məzənnə rejiminə keçilib və qiymət 1 manat 55 qəpiyə qalxıb. Hazırda kurs 1,7707 manatdır.
Oktyabrın 5-dən Mərkəzi Bank valyuta hərracında yeni qayda tətbiq edir. Valyuta hərraclarının nəticələri ilə bağlı ətraflı məlumatların verilməsi dayandırılıb, hərraca çıxarılan və satılan vəsaitlərin məbləğləri hər ayın sonunda açıqlanır.
Bu yeniliyin tətbiqinə qədər Mərkəzi Bank özünün və Dövlət Neft Fondunun hərraclarda satdığı vəsaitin məbləğini hərrac günü açıqlayırdı. Sentyabrın 29-da açıqlanmış son məlumata görə, manatın məzənnəsini nizamlamaq üçün keçirilən valyuta hərraclarında 4 milyard 817,8 milyon ABŞ dolları həcmində vəsait satılmışdı. Bunun 3 milyard 882,4 milyon dolları Dövlət Neft Fondunun, 935,4 milyon dolları Mərkəzi Bankın payına düşmüşdü.
Oktyabr ayında Dövlət Neft Fondu valyuta hərraclarında 371 milyon, noyabrda 301,5 milyon ABŞ dolları məbləğində vəsait satıb.
