Ermənistanda növbəti parlament seçkisi 2017-ci il aprelin 2-nə təyin olunub. Sənədi Ermənistan prezidenti Serj Sərkisyan imzalayıb.
Novator.az-ın məlumatına görə, Mərkəzi Seçki Komissiyasının dekabrın 30-da keçirilən iclasında seçki üzrə əsas tədbirlərin qrafiki təsdiqlənib. Qrafikə əsasən, seçkiqabağı təşviqat kampaniyası martın 5-dən 31-nə qədər davam edəcək.
Ermənistanın 2015-ci ilin dekabr ayında qəbul edilmiş yeni konstitusiyası ilə ölkə mərhələ-mərhələ parlament respublikası idarə üsuluna keçir. Ana qanuna görə, hökuməti proporsional sistemlə seçilən 101 nəfərlik parlamentdə azı 53 mandatı olan partiya quracaq. 2018-ci ildə Serj Sərkisyanın prezident səlahiyyətləri başa çatandan sonra icra hakimiyyəti və dövlət idarəçiliyi sisteminə ümumi rəhbərliyi hökumət həyata keçirəcək. Yalnız dövlət başçısı funksiyası daşıyan prezidenti isə parlament 7 il müddətinə seçəcək.
