Dövlət Neft Fondu valyuta vəsaitini saxlamaq, yerləşdirmək və idarə etmək qaydalarını, eləcə də illik gəlir və xərclər proqramının (büdcəsinin) tərtibi və icrası qaydalarını dəyişir. Novator.az rəsmi məlumata əsasən bildirir ki, dəyişiklik layihələri təsdiq üçün prezidentə təqdim olunacaq. Qərar dekabrın 29-da Dövlət Neft Fondunun Müşahidə Şurasının iclasında qəbul edilib.

Baş nazir, Dövlət Neft Fondunun Müşahidə Şurasının sədri Artur Rasizadənin apardığı iclasda Dövlət Neft Fondunun 2017-ci il üçün büdcə layihəsi də müzakirə olunub. Müşahidə Şurası icraçı direktorun təqdim etdiyi büdcə layihəsinə, Neft Fondunun idarə edilməsi ilə bağlı xərclərə dair məlumatlara baxıb. Büdcə layihəsi, o cümlədən Neft Fondunun vəsaitinin istifadə edilməsinin əsas istiqamətləri (investisiya siyasəti daxil olmaqla) və Neft Fondunun idarə edilməsi ilə bağlı illik xərclər smetasının layihələri məqbul hesab edilib. Sənədlər təsdiq üçün dövlət başçısına göndərilib.

Dövlət Neft Fondu 1999-cu ildə yaradılıb. 2016-cı ilin üçüncü rübünə olan hesabata görə, fondun aktivləri 35 milyard 822,1 milyon ABŞ dollarına bərabərdir.