Əbülfəs Qarayevə yeni vəzifə verildi
Dövlət başçısı İlham Əliyev turizmin inkişafı tədbirlərinə fərman verib. Novator.az-ın məlumatına görə, dekabrın 27-də imzalanan fərmanla Turizm Şurası haqqında əsasnamə və qurumun tərkibi təsdiq edilib.
Əsasnaməyə görə, Turizm Şurası Azərbaycan Respublikasında turizm sahəsində mövcud vəziyyətin təhlil edilməsi, bu sahədəki problemlərin aradan qaldırılması üçün müvafiq tədbirlərin görülməsi, turizm sahəsində dövlət orqanlarına həvalə edilmiş vəzifələrin icrasının əlaqələndirilməsi məqsədilə yaradılmış və ictimai əsaslarla fəaliyyət göstərən kollegial orqandır.
Şuranın sədrini və üzvlərini Azərbaycan prezidenti vəzifəyə təyin və vəzifədən azad edir. Dövlət başçısının fərmanı ilə şuranın sədri postu mədəniyyət və turizm naziri Əbülfəs Qarayevə həvalə olunub.
Şuranın üzvləri bu şəxslərdir:
İnam Kərimov – Vətəndaşlara Xidmət və Sosial İnnovasiyalar üzrə Dövlət Agentliyinin sədri
Arif Məmmədov – Dövlət Mülki Aviasiya Administrasiyasının direktoru
Nadir Hüseynov – xarici işlər nazirinin müavini
Emin Hüseynov – maliyyə nazirinin müavini
Sevinc Həsənova – iqtisadiyyat nazirinin müavini
Sahib Ələkbərov – vergilər nazirinin müavini
Tapdıq Əmiraslanov – fövqəladə hallar nazirinin müavini
Oruc Zalov – daxili işlər nazirinin müavini
Firdovsi Əliyev – ekologiya və təbii sərvətlər nazirinin müavini
Əsgər Abdullayev – Dövlət Gömrük Komitəsi sədrinin müavini
Rafiq Cəlilov – Əmlak Məsələləri Dövlət Komitəsi sədrinin müavini
Fərhad Tağı-zadə – Dövlət Sərhəd Xidməti rəisinin müavini
Pərviz Musayev – Dövlət Miqrasiya Xidməti rəisinin müavini
Bədəl Bədəlov – Dövlət Neft Şirkətinin vitse-prezidenti
Natəvan Qədimova – Naxçıvan Muxtar Respublikasının mədəniyyət və turizm naziri
Fidumə Hüseynova – Bakı Şəhər İcra Hakimiyyəti başçısının müavini
Əsgər Ələkbərov – “İçərişəhər” Dövlət Tarix-Memarlıq Qoruğu İdarəsinin rəisi
İlqar Mustafayev – Dənizkənarı Bulvar İdarəsinin rəisi.
Mədəniyyət və Turizm Nazirliyinə üç ay müddətində “Milli Turizm Təbliğat Bürosu” publik hüquqi şəxs yaratmaq tapşırılıb. “Milli Turizm Təbliğat Bürosu”nun saxlanması və fəaliyyətinin təmin edilməsi xərcləri onun fəaliyyətindən əldə edilən gəlirlər (o cümlədən aldığı kreditlər, qrantlar, habelə işlərin görülməsindən, xidmətlər göstərilməsindən daxilolmalar və s.) hesabına maliyyələşdiriləcək.
