Sahibkarlığa Kömək Milli Fondu dekabrın 28-i Xırdalan şəhərində işgüzar forum keçirib. İqtisadiyyat Nazirliyi bildirir ki, forumda Abşeron iqtisadi rayonunda fəaliyyət göstərən 20 sahibkara 7,7 milyon manat güzəştli kredit verilib. Vəsaitin əsasən heyvandarlıq, müasir istixana kompleksinin yaradılmasına, çörək, tikinti materialları, mətbəx və məişət əşyaları istehsalı, zeytunçuluq sahələrinin inkişafına sərf olunacağı, bununla da 180-dən çox yeni iş yerinin açılacağı bildirilir.

Məlumata görə, bu il 2500-ə yaxın sahibkarlıq subyektinin investisiya layihəsinə 190 milyon manat güzəştli kredit verilib, kreditlər hesabına maliyyələşən layihələrin reallaşdırılması 8100-dən çox yeni iş yerinin açılmasına imkan yaradıb. Güzəştli kreditlərin 74 faizi regionların, 26 faizi isə paytaxt və onun qəsəbələrinin payına düşür.

Verilən kreditlərin 82,3 faizi aqrar sektorun, 17,7 faizi sənaye və digər sahələrin inkişafına yönəldilib.