Ukrayna SSRİ simvollarından təmizlənir. Dekabrın 27-də Milli Yaddaş İnstitutu bu istiqamətdə aparılan işlərlə bağlı hesabat yayıb. Novator.az-ın məlumatına görə, hesabatda bildirilir ki, 2015-ci il mayın 21-də qüvvəyə minmiş uyğun qanunun tətbiqindən bəri 987 yaşayış məntəqəsinin, 51 mindən çox küçə, meydan və bağın adı dəyişib, 2389 heykəl və tarixi nişan, o cümlədən sosialist inqilabının lideri Leninin 1320 heykəli götürülüb.

SSRİ-yə dağıldığı 1991-ci ilə qədər 15 respublika daxil olub: Estoniya, Latviya, Litva, Moldova, Belarus, Ukrayna, Rusiya, Azərbaycan, Ermənistan, Gürcüstan, Qazaxıstan, Qırğızıstan, Tacikistan, Özbəkistan, Türkmənistan.

Ukraynanın dövlət müstəqilliyi Ali Radanın 24 avqust 1991-ci il aktı ilə bəyan olunub.

2014-cü ilin fevralında Ukraynada hakimiyyət xalq üsyanı ilə dəyişib, Rusiyaya yaxın qüvvələri Qərb meylli qüvvələr əvəzləyib. Bundan dərhal sonra Rusiya Ukraynanın Krım bölgəsini hərbi güclə tutaraq özünə birləşdirib və Donbasda iki separatçı rejimin əli ilə bu bölgənin bir hissəsini işğal edib. Bölgədə atəşkəs elan olunsa da, toqquşmalar tam dayanmır. BMT-nin monitorinq missiyasının hesabatına görə, 2014-cü ilin aprelindən 2016-cı ilin dekabrın 1-nə qədər Ukraynada 9 min 758 nəfər həlak olub.