Sosial təminat sistemi əhalinin dörddə birini əhatə edir
Əmək və Əhalinin Sosial Müdafiəsi Nazirliyi bildirir ki, hazırda ölkə əhalisinin təxminən 26 faizi – 2,5 milyondan çox adam sosial təminat sistemi ilə əhatə olunur. Nazirlik 1 milyon 312 min nəfərə əmək pensiyası, 506,1 min nəfərə müxtəlif növ müavinətlər və prezidentin aylıq təqaüdünü ödəyir. 162 min ailənin 707 min nəfər üzvü ünvanlı dövlət sosial yardımı alır.
Dövlət büdcəsindən sosial xərclər üçün 2014-cü ildə əvvəlki illə müqayisədə 9,9 faiz, 2015-ci ildə 2014-cü illə müqayisədə 3,4 faiz, 2016-cı ilin 9 ayında isə ötən ilin eyni dövrü ilə müqayisədə 9,9 faiz çox vəsait ayrılıb.
Ölkədə 15 min nəfərə (1102 nəfər insana sosial xidmət müəssisələrində stasionar şəraitdə, 11855 nəfər tənha ahıl və əlil şəxsə evlərində səyyar formada, sağlamlıq imkanları məhdud uşaqlardan və sosial təhlükəli vəziyyətdə olan yetkinlik yaşına çatmayanlardan ibarət 2046 nəfərə sosial sifarişlər üzrə layihələr çərçivəsində) sosial xidmətlər göstərilir.
