Azərbaycan prezidenti İlham Əliyev rusiyalı həmkarı Vladimir Putinə başsağlığı teleqramı göndərib. Teleqramda deyilir: “Tu-154” təyyarəsinin qəzaya uğraması nəticəsində çoxsaylı insan tələfatı barədə xəbər məni sarsıtdı. Azərbaycan xalqı adından və şəxsən öz adımdan Sizə, həlak olanların doğmalarına və yaxınlarına, bütün Rusiya xalqına dərin hüznlə başsağlığı verirəm”.

Novator.az bildirir ki, Rusiya Müdafiə Nazirliyinə məxsus sərnişin təyyarəsi dekabrın 25-i səhər saat 5:27-də qəzaya uğrayıb. Suriyaya uçan təyyarə Soçidən havaya qalxandan az sonra Qara dənizə düşüb. Təyyarənin göyərtəsində 92 nəfər – 8 heyət üzvü, 8 hərbçi, 9 jurnalist, 2 dövlət qulluqçusu, Rusiya Ordusunun Akademik Mahnı və Rəqs Ansamblının 64 üzvü və xeyriyyəçi Yelizaveta Qlinka olub.

Qara dənizdə axtarışlar aparılır. Bu gün səhərə olan məlumata görə, indiyədək 11 nəfərin meyiti tapılıb.

Dekabrın 26-sı Rusiyada ümummilli matəm elan edilib.