Axtarışlarla bağlı yeni açıqlama
Xəzərdə itkin düşmüş neftçilərin axtarışı ilə bağlı yeni açıqlama var.
Dekabrın 15-də güclü külək “Azneft” İstehsalat Birliyinin neft yığım məntəqələrinin birində estakadanı dənizə uçurub, 10 neftçi batıb. Həmin gün bir neftçinin meyiti tapılıb. Digər 9 neftçinin axtarışları hələ nəticə vermir.
Dövlət Dəniz Administrasiyasında Fövqəladə Hallar Nazirliyi, Müdafiə Nazirliyi, Dövlət Sərhəd Xidməti, SOCAR və Azərbaycan Xəzər Dəniz Gəmiçiliyi ilə birgə yaradılan qərargah dekabrın 21-də bəyan edib ki, axtarış-xilasetmə əməliyyatları uzunluğu 125, eni 108 kilometr ərazidə həyata keçirilir.
Rəsmi məlumata görə, Fövqəladə Hallar Nazirliyinin Kinoloji Xidmətinin xilasediciləri Zirə (Bulla) adasına sahilboyu baxış həyata keçirib. Dövlət Neft Şirkətinin Dalğıc və Qəza-Xilasetmə İşləri İdarəsinin dalğıcları da xilasetmə əməliyyatlarına cəlb olunub.
Əməliyyatlar ümumilikdə 44 gəmi və üzən vasitə, 6 vertolyot, habelə 700-dən artıq canlı qüvvə cəlb olunmaqla intensiv davam etdirilir.
Axtarış-xilasetmə zonasının daha da genişləndirilməsi ilə əlaqədar ərazidə olan bütün gəmilərlə və Xəzəryanı dövlətlərin gəmilərin hərəkətinin idarə olunması qurumları ilə məlumat mübadiləsi aparılır.
Fövqəladə Hallar Nazirliyi və Dövlət Sərhəd Xidmətinin canlı qüvvələri sahilboyu ərazilərdə də axtarış tədbirləri aparır.
