60 nəfərin ölümünə görə 11 nəfər həbs olunub
Rusiyanın İrkutsk şəhərində yemişan suyundan kütləvi zəhərlənməyə görə 11 nəfər həbs olunub. Novator.az-ın məlumatına görə, şəhər polisinin dekabrın 21-də yaydığı açıqlamada deyilir ki, tutulanlar məhsul istehsalı, saxlanması və satışında təhlükəsizlik qaydalarını pozmaqda ittiham olunurlar.
İrkutskda spirt tərkibli məhsulların satışına qadağa davam edir. Ötən gecə 12 tondan çox saxta alkoqollu içkinin dövriyyədən çıxarıldığı bildirilir. Şəhərdə yemişan suyu və spirt tərkibli başqa məhsullar hazırlayan qeyri-leqal sexlər aşkara çıxıb.
Tərkibində metil spirti olan, vanna qəbulu üçün nəzərdə tutulan yemişan suyundan kütləvi zəhərlənmə ötən həftəsonu qeydə alınıb. İrkutsk vilayətinin səhiyyə rəsmiləri 105 nəfərin zəhərləndiyini, onların 60-nın öldüyünü bəyan edib. 40 nəfər xəstəxanalarda müalicə alır.
