Sabiq nazir siyasətə atıldı
Ermənistanın sabiq müdafiə naziri Seyran Ohanyan siyasi fəaliyyətlə məşğul olacağını bəyan edib. Novator.az-ın məlumatına görə, Seyran Ohanyan dekabrın 20-də yenicə yaratdığı “Facebook” səhifəsində belə bir bəyanat yayıb: “Dövlətin və ordunun qurucularından olaraq, son 17 ildə Dağlıq Qarabağın və Ermənistanın müdafiə qurumlarına rəhbərlik etmiş şəxs kimi ölkədəki hərbi-siyasi durumu kənardan seyr edə bilmərəm. Mən nazir postundan sakitcə aralandım və yeni vəzifələr təklifindən imtina etdim. Çünki bilik və bacarığımı, təcrübəmi ölkənin daxili siyasi həyatında dəyişikliklərə yönəltmək qərarına gəlmişəm. Siyasi proseslərdə, xüsusilə seçki proseslərində fəal iştirak etmək niyyətindəyəm”.
Sabiq nazir bəzi siyasi qüvvələrlə, ictimai qurumlarla, ziyalılarla məsləhətləşmələr apardığını vurğulayıb. O deyib ki, 2017-ci ilin yazında keçiriləcək parlament seçkisində iştirak üçün tərəfdaşlar qrupu üzərində çalışır.
Seyran Ohanyan 1962-ci ildə Azərbaycanın Şuşa şəhərində anadan olub. 1983-cü ildə Bakı Ali Ümumqoşun Komandirləri Məktəbini bitirib. 1988-ci ilə qədər sovet ordusunun Almaniya Demokratik Respublikasındakı hissələrindən birində xidmət edib. Həmin il Zaqafqaziya Hərbi Dairəsinə keçirilib. 1992-ci ilin aprelinə qədər Xankəndidəki motoatıcı alayda xidmət edən Seyran Ohanyan sonra separatçı ordunun sıralarına qoşulub. Azərbaycan torpaqlarının işğalının və soyqırımı cinayətlərinin rəhbərlərindən biridir.
1999-cu il avqustun 2-dən Dağlıq Qarabağ rejiminin “müdafiə naziri” olub. 2007-ci ilin may ayından Ermənistan Silahlı Qüvvələrinin baş qərargah rəisi postunu tutub. Müdafiə naziri postuna 2008-ci ildə təyinat alıb.
Bu ilin payızında yeni hökumət formalaşıb, oktyabrın 3-də müdafiə naziri postuna Vigen Sərkisyan təyin edilib.
