“Azneft” İstehsalat Birliyinə aid estakadanın bir hissəsinin uçması nəticəsində Xəzərdə itkin düşmüş neftçilərin axtarışı hələ də nəticəsizdir.

Qəza dekabrın 15-də güclü külək zamanı baş verib. Həmin gün bir neftçinin meyiti tapılıb. Digər 9 neftçinin axtarışları davam edir. Prosesə Müdafiə Nazirliyi, Fövqəladə Hallar Nazirliyi, Dövlət Sərhəd Xidməti, SOCAR və Azərbaycan Xəzər Dəniz Gəmiçiliyinə məxsus gəmilər, vertolyotlar, canlı qüvvə cəlb olunub.

Dövlət Dəniz Administrasiyasında yaradılan qərargah dekabrın 20-də yeni məlumat yayıb. Qeyd olunur ki, axtarış-xilasetmə qərargahının rəhbər heyəti bu gün hadisə yerinə baş çəkib. Qərargahın rəhbər heyətinin verdiyi tapşırıq və tövsiyələrə uyğun olaraq axtarış-xilasetmə zonasının daha da genişləndirilməsi barədə qərar qəbul edilib. Axtarış-xilasetmə əməliyyatları uzunluğu 125, eni isə 108 kilometr ərazidə aparılacaq.