Həlak olan jurnalistlərlə bağlı yeni açıqlama
2016-cı ildə dünyada 70-dən çox jurnalist həlak olub. Novator.az-ın məlumatına görə, “Sərhədsiz reportyorlar” beynəlxalq media təşkilatının (mərkəzi qərargahı Parisdə yerləşir) dekabrın 19-da yaydığı hesabatda belə deyilir. Məruzəyə əsasən, həlak olanlar arasında 57 peşəkar jurnalist, 9 bloqçu, KİV-lə əməkdaşlıq edən 8 şəxs var.
Hesabatda bildirilir ki, bu il ən çox jurnalist Suriyada həlak olub – 19 nəfər. Əfqanıstanda 10, Meksikada 9, İraqda 7, Yəməndə isə 5 jurnalist həyatını itirib.
2015-ci ildə dünyada 101 jurnalist həlak olmuşdu.
BMT yanında məşvərətçi statusa malik “Press Emblem Campaign” qeyri-hökumət təşkilatının hesabatına əsasən isə 2016-cı ildə 31 ölkədə 144 jurnalist həlak olub. Qurum KİV əməkdaşları üçün ən təhlükəli ölkənin İraq olduğunu vurğulayıb. 2016-cı ildə bu ölkədə 16 media nümayəndəsi ölüb. Jurnalist ölümü ilə bağlı siyahının ilk beşliyində Suriya (14 jurnalist), Əfqanıstan (12), Meksika (12) və Yəmən (9) yer alır.
“Press Emblem Campaign” hesabata müxtəlif qəzalarda ölən jurnalistləri də əlavə edib.
