Bakıda seminar: diskussiya və təqdimat olub
Cəmiyyətin QHT-lər vasitəsilə insan hüquqları sahəsində qanunvericilik və dövlət proqramları barədə maarifləndirilməsi, vətəndaş cəmiyyətinin hüquqi məsuliyyəti, QHT-lərin sosial media resurslarına inteqrasiyasının gücləndirilməsi məqsədilə dekabrın 16-18-də Bakıda seminar keçirilib.
Seminar Avropa İttifaqı tərəfindən maliyyələşdirilən və BMT İnkişaf Proqramının dəstəyilə həyata keçirilən “Həssas əhali qruplarının sosial-iqtisadi hüquqlarının təşviqində vətəndaş cəmiyyətinin rolunun gücləndirilməsi” layihəsi çərçivəsində “İnternews Servis Azərbaycan”ın təşəbbüsü ilə baş tutub.
Azərbaycanda vətəndaş cəmiyyətinin inkişafına dəstək məqsədilə reallaşdırılan seminarı ekspertlər – Ombudsman Aparatının hüquqi maarifləndirmə sektorunun müdiri Müqalib Mahmudov, hüquqşünas Araz Əsədli, marketinq üzrə menecer Vüqar Səfərli və internet mediası üzrə ekspert İsmayıl İsmayilov aparıblar.
Təlimdə paytaxt və regionlarda fəaliyyət göstərən QHT-lərdən 12 nümayəndə iştirak edib.
Onlar dövlət orqanları, vətəndaş cəmiyyəti, o cümlədən QHT-lərlə insan hüquqları sahəsində əməkdaşlığın qurulmasına dair praktiki diskussiya aparıblar.
Təlimin gedişi zamanı “Dostluq” Gənclərin Əlaqələndirmə Mərkəzinin fəalı Ruslan Ağamətovun təşəbbüsü ilə layihə çərçivəsində yaradılan Toplum.az portalının ilkin versiyası təqdim olunub. Gənc fəal bildirib ki, sözügedən portaldan vətəndaş cəmiyyəti strukturları və fəallarının birgə fəaliyyətini təmin etmək üçün ortaq informasiya platforması kimi yararlanmaq nəzərdə tutulub.
Seminarı uğurla başa vuran iştirakçılara sertifikatlar verilib.
