Sərkisyan Xankəndidə avtomobil paylayıb
Ermənistan prezidenti Serj Sərkisyan Azərbaycanın Dağlıq Qarabağ bölgəsinə səfərini başa vurub. Səfər dekabrın 8-də başlamışdı.
Dekabrın 10-da Sərkisyan Ağdərənin Madagiz və Talış kəndləri yaxınlığındakı ön xəttə baş çəkib. Novator.az-ın məlumatına görə, Sərkisyanı Dağlıq Qarabağ separatçılarının başçısı Bako Saakyan, Ermənistanın müdafiə naziri, Silahlı Qüvvələrin Baş Qərargahının rəisi, separatçı ordunun komandanları müşayiət edib.
Dekabrın 11-də Sərkisyan Xankəndinin baş meydanında keçirilən tədbirdə hərbi qulluqçulara müxtəlif mükafatlar, o cümlədən avtomobillər təqdim edib. Həmin gün Ermənistan prezidenti mədəniyyət və incəsənət adamları ilə görüş keçirib, onların suallarını cavablandırıb.
2008-ci ildən prezident postunu tutan Serj Sərkisyan 24-cü dəfədir Dağlıq Qarabağa qanunsuz səfər edir. O, işğalçı müharibənin qaniçən liderlərindən biridir.
1988-ci ildən başlayaraq Ermənistanın Azərbaycana hərbi təcavüzü nəticəsində Dağlıq Qarabağ bölgəsi (Ağdərə, Xocavənd, Xankəndi, Xocalı, Şuşa) və daha 7 rayon (Laçın, Kəlbəcər, Zəngilan, Qubadlı, Cəbrayıl, Ağdam, Füzuli) zəbt edilib. 1994-cü ilin mayında elan olunan atəşkəsdən bəri ATƏT-in Minsk qrupunun vasitəçiliyi ilə aparılan sülh danışıqları heç bir nəticə vermir.
2016-cı il aprelin 2-dən 5-dək Azərbaycanın Silahlı Qüvvələri əks-həmlə əməliyyatları zamanı Ağdərə, Füzuli və Cəbrayıl rayonları ərazilərində vacib yüksəklikləri və strateji əhəmiyyətli əraziləri işğaldan azad edib. Ümumilikdə 2000 hektardan artıq ərazinin azad edildiyi və daha çox ərazinin əməliyyat baxımından nəzarət altına keçdiyi bildirilir.
