Ukraynada savaş itkiləri 10 min nəfərə yaxınlaşır
BMT-nin monitorinq missiyası Ukraynanın şərqində 2014-cü ildən davam edən savaşda həlak olanların sayını açıqlayıb. Novator.az-ın məlumatına görə, hesabatda qeyd olunur ki, 2014-cü ilin aprelindən 2016-cı ilin dekabrın 1-nə qədər Ukraynada 9 min 758 nəfər həlak olub, 22 min 779 nəfər yaralanıb.
BMT-nin məruzəsində əsasən, toqquşmalarda həlak olanların 2 mindən çoxu Ukrayna Silahlı Qüvvələrinin hərbçilərdir. Münaqişə ərzində Donbasda 2 min mülki şəxs həlak olub. Yaralanan mülki şəxslərin sayının 6-7 min arasında dəyişdiyi bildirilir.
2014-cü ilin fevralında Ukraynada hakimiyyət xalq üsyanı ilə dəyişib, Rusiyaya yaxın qüvvələri Qərb meylli qüvvələr əvəzləyib. Bundan dərhal sonra Rusiya Ukraynanın Krım bölgəsini hərbi güclə tutaraq özünə birləşdirib və Donbasda iki separatçı rejimin əli ilə bu bölgənin bir hissəsini işğal edib. Bölgədə atəşkəs elan olunsa da, toqquşmalar tam dayanmır.
