Dekabrın 8-də Milli Məclis 2017-ci ilin büdcə zərfinin ilkin müzakirəsini başa vurub. Zərfə daxil olan yaşayış minimumu haqqında, ehtiyac meyarının həddi haqqında, Dövlət Sosial Müdafiə Fondunun 2017-cı il büdcəsi haqqında qanunların, Milli Məclisin və Hesablama Palatasının 2017-ci il üçün xərclər smetalarının müzakirəsindən sonra təklifləri dəyərləndirmək üçün hökumətə dekabrın 16-dək vaxt verilib.

Novator.az bildirir ki, layihəyə görə, 2017-ci il yanvarın 1-dən yaşayış minimumu ölkə üzrə 155 manat, əmək qabiliyyətli əhali üçün 164,5 manat, pensiyaçılar üçün 130,2 manat, uşaqlar üçün 136,6 manat olmalıdır.

Ehtiyac meyarının həddini 105 manatdan 116 manata qaldırmaq planlaşdırılır.

Dövlət Sosial Müdafiə Fondunun 2017-ci il üçün xərcləri 3,4 milyard manat proqnozlaşdırılır. Bu, 2016-cı ilin gözlənilən icra göstəricisindən 248 milyon manat və ya 8 faiz çoxdur.

Əmək pensiyaları üzrə xərclərə 229 milyon manat, məcburi dövlət sosial sığorta haqları hesabına verilən müavinətlərə 5,6 milyon manat, digər xərclərə 13,4 milyon manat artımın yönəldilməsi nəzərdə tutulur (Fondun büdcəsi).