Deputatlar hökumətə vaxt verib
Milli Məclis 2017-ci ilin dövlət büdcəsinə dair təkliflərə münasibət bildirilməsi üçün hökumətə dekabrın 16-dək vaxt verib. Dekabrın 6-sı və 7-si keçirilmiş müzakirələrdə 70-dən çox deputat dövlət büdcəsinə dair fikirlərini açıqlayıb və təkliflərini diqqətə çatdırıb.
2017-ci ilin dövlət büdcəsinin gəlirləri 16 milyard 255 milyon manat məbləğində olmaqla cari ilin proqnozuna nisbətən 567 milyon manat və ya 3,4 faiz azdır. Gəlirlərin 8,3 milyard manatı və ya 51,2 faizi qeyri-neft sektorundan daxilolmaların payına düşəcək. Vergilər Nazirliyinin xətti ilə dövlət büdcəsinə 7 milyard 510 milyon manat daxilolma proqnozlaşdırılır, Dövlət Gömrük Komitəsi vasitəsilə isə 2 milyard 200 milyon manat vəsaitin daxil olacağı nəzərdə tutulub. Büdcə təşkilatlarının ödənişli xidmətlərindən 353 milyon manat vəsait proqnozlaşdırılır, digər daxilolmalar üzrə 92 milyon manat vəsait gözlənir.
Dövlət büdcəsinin xərcləri 16 milyard 900 milyon manat təşkil edəcək. Bu, cari illə müqayisədə 1 milyard 595 milyon və ya 8,6 faiz azdır.
