ABŞ-ın yeni seçilmiş prezidenti Donald Tramp Ceyms Mettisi müdafiə naziri postuna namizəd irəli sürüb.

Novator.az-ın məlumatına görə, 66 yaşlı Ceyms Mettis hərbi xidmətə 1969-cu ildə dəniz piyadası hissələrində başlayıb. O, 1991-ci ildə İraq müharibəsində iştirak edib, sonra Əfqanıstanda xidmət keçib. 2003-cü ildən İraqda diviziya komandanı, 2010-2013-cü illərdə mərkəzi komandanlıqda Yaxın Şərq və Mərkəzi Aşıya bölgələri üzrə məsul şəxs olub.

ABŞ hərbi dairələrində Ceyms Mettis sərtliyinə görə “quduz it” ləqəbi ilə tanınır. Heç vaxt ailə qurmadığı üçün onu “döyüşçü rahib” də adlandırırlar.

Ceyms Mettisin namizədliyi Senatda təsdiqlənməlidir. Qanuna görə, müdafiə naziri postunu ya mülki şəxs, ya da hərbi xidmətdən 7 il əvvəl tərxis olunmuş hərbçi tuta bilər. Ceyms Mettis hərbi xidməti 3 il əvvəl tərk edib, elmi və ictimai fəaliyyətlə məşğul olur.

Donald Tramp prezident səlahiyyətlərinin icrasına 2017-ci il yanvarın 20-də başlayacaq.