Özbəkistanda yeni prezident
Özbəkistanda dekabrın 4-də keçirilmiş növbədənkənar prezident seçkisinin ilkin nəticələri açıqlanıb. Novator.az-ın məlumatına görə, prezidentlik uğrunda 4 nəfər mübarizə aparıb: Liberal Demokrat Partiyasından Şövkət Mirziyayev (baş nazir, prezident səlahiyyətlərinin icraçısı), Milli Dirçəliş Partiyasından Sərvər Otamuradov (parlamentin aşağı palatasının sədr müavini), Xalq Demokrat Partiyasından Hətəmcan Ketmonov və Sosial Demokrat Partiyasından Nəriman Umarov.
Mərkəzi Seçki Komissiyasının dekabrın 5-də açıqladığı nəticələrə əsasən, Şövkət Mirziyayev səslərin 88,61 faizini (15 milyon 900 min səs) toplayaraq qalib gəlib.
Şövkət Mirziyayev 1957-ci il iyulun 24-də Cizak vilayətində anadan olub. 1981-ci ildə Daşkənd İrriqasiya və Meliorasiya İnstitutunu bitirib. 1992-ci ilədək həmin institutda elmi işçi, komsomol təşkilatının katibi, partiya təşkilatının rəhbəri, 1-ci prorektor vəzifələrində çalışıb. Texnika elmləri namizədidir.
1990-cı ildə Özbəkistan Ali Sovetinin, 1994 və 1999-cu illərdə Ali Məclisin deputatı seçilib.
1992-ci ildə Daşkəndin Mirzə-Uluqbəy rayonunun icra hakimi təyin olunub. 1996-cı ildə Cizak vilayətinin hakimi vəzifəsinə keçirilib. 2001-ci ildə Səmərqənd vilayətinin icra hakimi vəzifəsinə təyinat alıb.
2003-cı il dekabrın 12-dən baş nazirdir.
Ailəlidir, iki qızı, bir oğlu var.
Özbəkistana 1989-cu ildən rəhbərlik edən prezident İslam Kərimov 2016-cı il sentyabrın 2-də dünyasını dəyişib. Sentyabrın 8-də baş nazir Şövkət Mirziyayev dövlət başçısı səlahiyyətlərinə yiyələnib.
