Nazirlik 21,5 mindən çox müraciəti cavablandırıb
Noyabr ayında Əmək və Əhalinin Sosial Müdafiəsi Nazirliyinin 142 və 190 çağrı mərkəzləri vətəndaşların 21543 müraciətini cavablandırıb. Hesabata görə, vətəndaşlar əsasən sosial təminat, əmək qanunvericiliyi, pensiya və müavinətlər, sosial sığorta, məşğulluğun təminatı, tibbi-sosial ekspertiza və reabilitasiya, əmək və sosial müdafiə sahəsində elektron xidmətlərdən istifadə ilə bağlı sorğularını ifadə ediblər. Ümumi müraciətlərin 96,8 faizi və ya 20 861-i belə sorğu xarakterli müraciətlərdən ibarət olub.
142 və 190 mərkəzlərinə daxil olan müraciətlərin 31,9 faizi sosial təminat, 10,6 faizi əmək qanunvericiliyi, 5,7 faizi tibbi-sosial ekspertiza və əlilliyi olan şəxslərin reabilitasiyası, 6,4 faizi məşğulluğun təminatı, 2,2 faizi fərdi uçotun təşkili, 9,7 faizi pensiya və müavinətlər, 8,2 faizi məcburi dövlət sosial sığortası məsələlərini əhatə edib.
