Noyabrın 24-də Əmlak Məsələləri Dövlət Komitəsi rəsmi məlumat yayıb. Qeyd olunur ki, Nazirlər Kabineti özəlləşdirilməyə açılan qeyri-profil dövlət müəssisələri və obyektlərinin siyahısını təsdiqləyib. Siyahıya ümumilikdə 25 dövlət idarə və təşkilatının tabeliyində olan 137 dövlət əmlakı daxildir. Başqa 352 dövlət müəssisə və obyekti də özəlləşdirilməyə açılıb. Bu müəssisələrin siyahısı Privatization.az özəlləşdirmə portalında yerləşdirilib.

Özəlləşməyə yeni açılan müəssisələrə müxtəlif dövlət qurumları və təşkilatlarının balansında olan istirahət zonaları, xəstəxanalar, ambulatoriyalar, poliklinikalar, zavodlar, qeyri-yaşayış sahələri, müxtəlif təyinatlı bina və obyektlər aiddir. Qeyri-profil müəssisə və obyektlər sırasında Mərkəzi Dənizçilər Xəstəxanası, Bakı Dəmir Yolu Xəstəxanası, Bakı Vaqon Təmiri Zavodu, Sumqayıt Sənaye Kombinatı, “Sərhədçi” İdman İstirahət Mərkəzi, Texniki Universitetin İdman Sarayı, Bakının Səbail və Nəsimi rayonlarında yeraltı dayanacaq kompleksləri, Mərdəkanda “Dalğa”, Xaçmazda “Nabran” istirahət mərkəzləri, İmişlidə Bəhrəmtəpə Dəmir Beton Zavodu, Balakəndə “Qubek Otel”, Qusarda “Şahdağ” istirahət zonaları kimi dövlət əmlakları var.