5-ci turda ilk gün 5 komandaya düşdü
UEFA Çempionlar Liqasının qrup mərhələsində 5-ci tur start götürüb. Novator.az-ın məlumatına görə, noyabrın 22-si evdə İngiltərənin “Tottenhem” komandasına 2:1 hesabı ilə qalib gələn “Monako” (Fransa) E qrupundan növbəti raunda adlayıb.
Bu qrupdan 1/8 finala ikinci vəsiqə Almaniyanın “Bayer” komandasına qismət olub.
Portuqaliyada “Sportinq”i 2:1 hesabı ilə yenən “Real” (İspaniya) F qrupundan, evdə “Brügge”ni (Belçika) udan (2:1) “Lester” (İngiltərə) G qrupundan, İspaniyada “Sevilya”dan üstün olan (3:1) “Yuventus” da (İtaliya) 1/8 finala çıxıblar.
İndiyəcən A qrupundan “Arsenal” (İngiltərə), PSJ (Fransa), D qrupundan “Bavariya” (Almaniya), “Atletiko” (İspaniya), F qrupundan “Borussiya” (Dortmund, Almaniya) komandaları növbəti mərhələyə keçmişdilər.
