ATƏT-in Minsk qrupunun amerikalı həmsədri Ceyms Uorlik vəzifədən gedir. O, “Twitter” səhifəsində yazıb ki, səlahiyyət müddəti bu il dekabrın 31-də başa çatır. Həmsədrin yazdığına görə, diplomatik fəaliyyəti başa çatdıqdan sonra “Yeqorov, Puqinski, Afanasyev və tərəfdaşları” adlı vəkillər bürosunda çalışacaq.

Novator.az bildirir ki, 1993-cü ildə yaradılmış büronun Rusiya, Ukrayna, Belarus, Böyük Britaniya və ABŞ-da ofisləri var. Büro MDB məkanında biznesə, dövlət hakimiyyəti orqanlarına, xarici təşkilatlara və maliyyə institutlarına hüquq dəstəyi göstərir.

1992-ci ildə Dağlıq Qarabağ münaqişəsinin dinc yolla tənzimləməsi üçün yaradılan Minsk qrupunun 11 üzvü var: Rusiya, Fransa, ABŞ, Belarus, Almaniya, İtaliya, İsveç, Finlandiya, Türkiyə, Ermənistan, Azərbaycan.

1994-cü ildə həmsədrlik institutu yaradılıb. Hazırda həmsədr postunu Ceyms Uorliklə bərabər Fransadan Stefan Viskonti və Rusiyadan İqor Popov tutur.