Xristian Demokrat İttifaqının sədri Angela Merkel Almaniya hökumətinin başçısı postunda qalmaq niyyətini qətiləşdirib. Novator.az-ın məlumatına görə, Angela Merkel partiya rəhbərliyinin 20 noyabr iclasında federal kansler postuna namizəd olmaq istədiyini bəyan edib. Namizədlik Xristian Demokrat İttifaqının 5-7 dekabr qurultayında rəsmiləşməlidir.
Almaniyada federal kansler postunu parlament seçkisində qalib gələn partiyanın təklif etdiyi şəxs tutur. Parlament seçkisi gələn ilin payızında keçiriləcək. Son rəy sorğuları almanların 55 faizinin Angela Merkelin hakimiyyətdə qalmasına tərəfdar olduğunu göstərir.
Angela Merkel 1954-cü ildə Almaniya Federativ Respublikasının Hamburq şəhərində doğulub. Üç yaşında olarkən o, valideynləri ilə Almaniya Demokratik Respublikasına köçüb.
1978-ci ildə Leypsiq Universitetinin fizika fakültəsini bitirən Angela Merkel uzun müddət elmi fəaliyyətlə məşğul olub, 1990-cı ildə Almaniya birləşəndən sonra siyasətə qoşulub. O, əvvəl Xristian Demokrat İttifaqının üzvü, sonra isə parlamentin bu partiyadan deputatı olub. 1991-ci ildə Xristian Demokrat İttifaqı sədrinin müavini, 1998-ci ildə baş katib, 2000-ci ildə sədr seçilib.
Angela Merkel 1991-1994-cü illərdə qadınlar və gənclər naziri, 1994-1998-ci illərdə isə ətraf mühit və təbiətin mühafizəsi naziri postlarını tutub. O, 2005-ci ildən Almaniya kansleridir.
