Estoniyada hökumət başına Yuri Ratas gəlir
Noyabrın 21-i Estoniyada yeni hökumət koalisiyası barədə müqavilə imzalanıb. Novator.az-ın məlumatına görə, yeni hökuməti Mərkəzçi, Vətən və Respublika İttifaqı, Sosial Demokrat partiyaları yaradır.
Baş nazir postunu Mərkəzçi Partiyanın lideri Yuri Ratas tutacaq. Bu partiyaya 4 nazir postu verilir. Digər iki partiyanın hərəsi 5 nazir portfeli alır.
Estoniya parlamenti baş nazir Taavi Rıyvası noyabrın 10-da istefaya göndərib. Hökumətə etimadsızlıq təşəbbüsünü 41 müxalif deputat irəli sürüb. Bu təşəbbüsə hakim koalisiyadan Sosial Demokrat Partiyası, Vətən və Respublika İttifaqı da tərəfdar çıxıb.
37 yaşlı Taavi Rıyvas 2014-cü il martın 26-dan baş nazir idi.
Baş nazir postuna indiki namizəd Yuri Ratasın 38 yaşı var. Parlament sədrinin müavinidir. Əvvəllər paytaxt Tallinin meri olub.
